الموقع على فيسبوك
لاحقا

روايات حلوه وشيقة

رواية لوعة عشق
البارت 04
الام كانت فى المطبخ بتعمل الغدا وسمعت باب الشقه بيخبط فراحت بسرعه علشان تفتح علشان امال ما تصحاش من نومها وهى تعبانه . فتحت الام الباب وشافت شاب واقف وشايل بوكيه ورد فى أيده . الام ... مين حضرتك وعاوز مين يا ابنى ؟ شريف .... اهلا يا حاجه انا شريف كمال مدير امال فى الشركه وكنت جاى اطمن عليها . الام ... اهلا وسهلا يا ابنى اتفضل . شريف دخل والام رحبت بيه وبدأ يسأل عن امال . شريف .... امال عامله ايه دلوقتى يا حاجه ؟ الام ... الحمد لله يا ابنى من ساعه ما جت وهى نايمه . وحكت ليا على اللى حصل معاها ومتشكرين لتعبك يا ابنى معاها . شريف ... والله يا حاجه ما كنت اقصد خالص وانا خارج من المكتب بتاع والدى ولقيتها فجاه فى وشى وبعدين ولا تعب ولا حاجه دى اقل حاجه قدرت اقوم بيها . الام ... حصل خير يا ابنى الحمد لله على كل شىء . تحب تشرب ايه قهوة ولا حاجه ساقعه؟؟ شريف ... ما تتعبيش نفسك يا حاجه انا هاطمن على امال وامشى على طول علشان بابا عاوز هو كمان يطمن عليها . الام ... ثانيه واحده وهادخل اناديها من اوضتها . شريف ... اتفضلى يا حاجه . الام راحت على اوضه امال اللى كانت نايمه من التعب وبدأت تصحيها بشويش . الام .... امال . امال قومى يا بنتى فى ضيوف عاوزينك بره . امال .... مين بس يا ماما اللى عاوزينى سبينى انام شويه . الام ... شريف بيه المدير بتاع الشركه برة وجاى علشان يطمن عليكى . امال... ايه بتقولى مين ؟ شريف برة وعاوز يطمن عليا . ده جى ليه ده 😱 الام ... اهدى يا بنتى هايكون جاى ليه يعنى اكيد علشان يكمن عليكى ويشوفك عامله ايه . قامت امال بسرعه من السرير وطلبت من مامتها انها تخرج تقعد معاه عقبال لما تغير هدومها وتطلع تسلم عليه وتقدمله حاجه يشربها . وفعلا راحت الام وقعدت معاه وبعد شويه خرجت امال وسلمت على شريف اللى اول ما شافها قام وقف وسلم عليها . شريف .... عامله ايه دلوقتى يا امال. امال ... الحمد لله يا شريف بيه احسن بكتير . الام .... اروح انا بقى وأجهز الغدا لازم نتغدا مع بعض . شريف .... لا يا افندم ما تتعبيش نفسك انا شويه وهامشى على طول . الام ... وده يصح يا ابنى احنا ناس تعرف فى الواجب والأصول كويس ولا احنا مش اد المقام . شريف بص لامال اللى كانت لسه مش مستوعبه أن شريف عندها فى البيت ومش عارفه تقول ايه . الام ... ولا ايه يا امال يرضيكى كده ينزل من غير ما ناكل مع بعض عيش وملح . امال ... لا طبعا يا امى خلى حضرتك وانا هاروح اجهز السفرة . وفعلا راحت امال ودخلت المطبخ ومكنتش مصدقه أن شريف عندهم فى فى البيت وقرصت نفسها علشان تفوق وتعرف أن ده فعلا حقيقى . جهزت السفرة وحطت الاطباق وجهزت السلطه وخلت السفرة تفتح النفس وبعدها راحت علشان تناديهم . مامتها كانت لسه مخلصه الاكل اللى كانت ريحته الروعه طالعه وماليه المكان كله . راحت امال وطلبت من شريف ومامتها أنهم يجوا علشان الاكل جاهز . قام شريف وطلب أنه يغسل أيده قبل ما يقعد وياكل وآمال دخلته الحمام وبعدها راح السفرة وقعد الكل وبدؤوا يكلوا . شريف .... ما شاء الله يا حاجه الاكل حلو جدا تسلم اديكى. الام ... شكرا يا ابنى وبالهنا والشفا . انا بقالى كتير ما وقفتش اعمل اكل بس علشان تعب امال وقفت النهارده وعملته ونصيبك انك تدوقه . شريف .... ربنا يديكى الصحه . امال كانت فى دنيا تانيه ومش عارفه تقول ايه ولا تتصرف ازاى وكانت مستغربه جدا أن شريف قاعد معاهم وكمان ايه على سفرة واحده وعندها فى البيت كمان. وطول ما هى قاعده كانت سرحانه وعماله تقلب بالشوكه وخلاص فى الطبق اللى قدامها وده اللى خلى شريف واخد باله منها . خلصوا الاكل وقاموا قعدوا فى الانتريه . الام .. اروح انا بقى اجيب القهوة . قهوتك ايه يا ابنى. شريف ...مضبوطه لو سمحتى . الام ... ثوانى وهاتكون جاهزة يا ابنى . شريف .... عامله ايه يا امال. امال ... الحمد لله يا شريف بيه . شريف ... ممكن تقولى شريف بس لو سمحتى . امال وشها احمر اوى ومعرفتش ترد عليه شريف ... انتى ليه نزلتى من المستشفى ومستنتيش علشان اوصلك للبيت . امال ... يا شريف بيه احنا ناس فى منطقه شعبيه ووالدى متوفى الناس تقول ايه وانا راكبه معاك العربيه لوحدنا وكمان موصلنى لحد البيت . شريف ... عندك حق طبعا بس انا مش قصدى أنى احرجك مع حد انا كنت عاوز اوصلك علشان انتى تعبانه وانا السبب فى تعبك ده . امال ... والناس اللى هاتشوفنا ما تعرفش كل ده يبقى ليه اجيب لنفسى الكلام واخلى حد يتكلم عليا . شريف .... كلامك صح وانا بعتذر أنى جيت من غير ميعاد بس ما كنتش اقدر انام الا لما اطمن عليكى . امال انكسفت اوى من كلامه ومن نظراته ليها . ومعرفتش ترد عليه لولا أمها جت و دخلت بفنجان القهوة . الام ... اتفضل يا ابنى القهوة. شريف ... تسلم اديكى يا حاجه تعبتك معايا. الام ... تعبك راحه يا ابنى. شرب قهوته والام استأذنت انها تقوم تصلى وشريف قام علشان يمشى بس قبل ما ينزل طلب من امال رقم تليفونها علشان يبقى يطمن عليها وبلغها أن ابوه اداها يومين اجازة علشان تستريح براحتها . نزل شريف وآمال خدت نفسها وكأنها كانت بتحلم . فاقت على موبيلها بيرن وراحت علشان تشوف مين . امال.... السلام عليكم . فاتن ... وعليكم السلام ازيك يا امال عامله ايه يا حبيبتى دلوقتى. امال .... الحمد لله يا فاتن احسن . فاتن ... معلش يا حبيبتى والله كان نفسى اجى معاكى المستشفى بس انتى عارفه علشان الشغل ومفيش غيرى انا وانتى . امال ... عارفه يا قلبى ولا يهمك وشكرا على سؤالك . قفلت امال مع فاتن وراحت تشوف مامتها اللى فى أوضتها . الام .... الضيف مشى يا بنتى ؟ امال .... اه يا امى نزل . الام .... ما شاء الله عليه شكله ابن حلال ومحترم ومؤدب . وشكله كده مهتم بيكى. امال .... ده اتحول فجاه من ناحيتى يا ماما والله . ده كان بيعاملنى وحش اوى ومش انا بس اى وحده بتشتغل فى الشركه بيعاملها وحش شكله مش بيحب البنات خالص . الام ... اكيد فيه سبب لكده علشان مايحبش البنات بس اللى انا شوفته بعينى واهتمامه بيكى حاجه تانيه . امال.... انا برده بدأت احس الاحساس ده وأنه مهتم بيا الايام دى . ده حتى كمال بيه ربنا يكرمه بيعاملنى كويس اوى . الام ... ابوه اسمه كمال يا بنتى . امال .... اه يا امى اسمه كمال مهران الشرقاوى. صاحب اكبر مجموعه شركات فى الوطن العربى . الام .... انتى بتقولى اسمه ايه ؟؟؟ امال .... فى ايه يا ماما انتى اتفاجئتى بالاسم كده ليه ؟ الام وشها ظهر عليه الاستغراب والزهول . انتى متاكده يا امال من الاسم ده . امال .... اه طبعا يا امى انا شغاله معاهم بقالى اكتر من سنتين وعارفه اسمه كويس . فى ايه يا ماما انتى تعرفيه ولا ايه . الام ... اقعدى يا امال وانا هاحكيلك كل حاجه مقدرتش احكيهالك طول العمر ده وكنتى على طول تسألينى وانا اهرب من سؤالك انا وابوكى الله يرحمه . وكنتى بتستغربى اوى من وانتى صغيرة اننا ملناش اهل ولا قرايب زى بقيت اصحابك . انا هاحكيلك يا بنتى كل حاجه علشان تعرفيها قبل ما يجرالى حاجه واموت . امال ... بعد الشر عليكى يا ماما . الام بدأت تحكى وآمال كانت سمعاها . فلاش باك . الاب ..... قولتلك مش هاتتجوزيه يعنى مش هاتتجوزيه يا جميله . جميله .... يا بابا احنا بنحب بعض من زمان وهو هايشتغل وهايبنى نفسه وبكرة يبقى حاجه كبيرة . الاب .... هى كلمه واحده مفيش غيرها ولو عملتى اللى فى دماغك لا انتى بنتى ولا اعرفك وهاتبرا منك خالص لحد ما اموت . كمال .... اسمعى كلام بابا يا جميله واوعى تسبينا احنا ملناش غير بعض . بعد ماما الله يرحمها . جميله... انت لسه صغير يا كمال وبكرة تعرف يعنى ايه حب وانك مش هاتقدر تستغنى عن اللى بتحبه . كمال .... واحنا بنحبك يا جميله وانا مليش غيرك بعد امى الله يرحمها ومش هاقدر استغنى عنك . جميله خدته فى حضنها وفضلوا يعيطوا مع بعض . صحى الاب الصبح ودور على جميله فى كل العزبه ملقهاش . بااك الام .... هى دى حكايتى يا امال سبت ابويا وسبت اخويا الوحيد واتجوزت ابوكى اللى كنت بحبه بس كانت ظروفه وحشه وفضلت وحشه لحد ما مات . ولما خلفتك سميتك على اسم امى الله يرحمها امال . امال .... انا مش مصدقه كل اللى انتى قولتيه ده انا كأنى بحلم . ليه ما قولتيش الحكايه دى من زمان انا اول مرة اسمعها منك وكنت على طول اقولك فين اهلك وفين اخواتك كنتى تردى وتقولى انا مقطوعه من شجرة ومليش اهل خالص . حتى بابا الله يرحمه كان كده مالوش اهل خالص . الام ....ابوكى لما هربنا مع بعض كان عايش مع عمته بعد ما أمه وأبوه ماتوا وهى اللى ربته وعرفنا بعد كام شهر من هروبنا انها ماتت من زعلها على ابوكى . وانا كنت عرفت برضه أن ابويا مات من زعله عليا وحاولت ادور على اخويا كمال بس ما لقتهوش وعرفت أنه باع كل حاجه وسأل البلد وده اللى كان تاعبنى وتاعب قلبى طول حياتى . امال اترمت فى حضن امها وفضلوا يعيطوا هما الاتنين . امال .... يعنى كمال بيه ده يبقى خالى وشريف ده بيكون ابن خالى .الام ... لازم نتأكد الاول ومش هاتاكد غير لما اشوفه بعينى اودامى واعرف أنه كمال اخويا . امال ... يبقى لازم نروح على الشركه الصبح انا وانتى . تواقعتكم هاتكون ايه لما كمال بيه يعرف أن أخته عايشه .
عدد المشاهدات : 86
أضيف يوم : 01/09/2019